កុំព្យូទ័រស្ដើងរបស់ក្រុមហ៊ុន Apple ដែលដាក់លក់នៅលើទីផ្សារនាពេលបច្ចុប្បន្នមានអេក្រង់ត្រឹមតែ 7.9-inch iPad mini និង 9.7-inch សម្រាប់ iPad Air និង iPad 4 ជាដើម តែទោះជាយ៉ាងនេះក្ដីក៏នាពេលកន្លងមកធ្លាប់មានពាក្យចចាមអារ៉ាមនិងសេចក្ដីរាយការណ៍មួយចំនួនថាក្រុមហ៊ុន Apple នឹងបញ្ចេញកុំព្យូទ័របន្ទះស្ដើងដែលមានអេក្រង់ធំៗនាពេលអនាគត ។
សូមរំលឹកថាកាលពីចុងខែកញ្ញាកន្លងទៅមាន សេចក្ដីរាយការណ៍ថា «Apple ចាប់ដៃជាមួយ Quanta Computer ផលិត iPad ថ្មី អេក្រង់ធំជាងមុន» ប្រភពដែលធ្លាប់ចេញកាលពីមុននោះថា iPad ជំនាន់ក្រោយៗអាចនឹងមានទំហំដល់ទៅ 12-inch ឬ 13-inch ។ ដោយឡែកបើយោងតាមប្រភពពីគេហទំព័រ UnwiredView ដែលចុះផ្សាយកាលពីថ្ងៃម្សិលមិញបានអោយដឹងថាបច្ចុប្បន្ននេះក្រុមហ៊ុន Apple កំពុងតែសាកល្បងអេក្រង់ដែលអាចបង្ហាញរូបភាពក្នុងកម្រិតភាពច្បាស់ 2K និង 4K សម្រាប់បំពាក់លើកុំព្យូទ័របន្ទះស្ដើង iPad Pro ឬ iPad Maxi ដែលមានអេក្រង់ទំហំ 12.9-inch ។
ដូចអ្វីដែលប្រិយមិត្តធ្លាប់បានជ្រាបហើយថាអេក្រង់ដែលអាចបង្ហាញរូបភាពក្នុងកម្រិតភាពច្បាស់ដល់ទៅ 4K ឬ Ultra HD គឺភាគច្រើនត្រូវបានបំពាក់ទៅលើទូរទស្សទំនើប (smart TV) ហើយបើ Apple ពិតជាបំពាក់អេក្រង់ប្រភេទនេះទៅលើ iPad ជំនាន់ថ្មីមែននោះវាពិតជាអស្ចារ្យណាស់ សម្រាប់អតិថិជនរបស់ Apple ក្នុងការទទួលយកនូវបទពិសោធន៍ថ្មី ។ បើយោងតាមប្រភពខាងលើបានឲ្យដឹងថាអេក្រង់ថ្មីនេះគឹកំពុងតែធ្វើការសាកល្បងដោយរោងចក្ររបស់ Apple ដែលមានមូលដ្ឋាននៅទីក្រុង Cupertino រដ្ឋ California សហរដ្ឋអាមេរិក ។
គេរំពឹងថាកុំព្យូទ័របន្ទះស្ដើងរបស់ Apple អេក្រង់ទំហំ 12.9-inch ដែលបំពាក់ដោយអក្រង់ 2K (2,048×1,536 pixels) នឹងត្រូវបញ្ចេញក្នុងខែមេសាឆ្នាំ២០១៤ ហើយ iPad អេក្រង់ទំហំ 12.9-inch ជាមួយនឹងកម្រិតភាពច្បាស់4K (4,096×3,072 pixels) វិញនឹងត្រូវចេញនៅក្នុងខែតុលា ឆ្នាំ២០១៤ ។