បន្ទាប់ពីមានជម្លោះចោទគ្នាទៅវិញទៅមកពីរឿងល្មើសកម្មសិទ្ធិ បញ្ញាលើប៉ាតង់បច្ចេកវិទ្យាដែលបំពាក់លើទូរសព្ទរវាង Apple និង Samsung រ៉ាំរ៉ៃអូសបន្លាយរយៈពេលយូររួចមក ថ្ងៃនេះស្រាប់តែមានការអះអាងពីអ្នកជំនាញផ្នែកប៉ាតង់ថា សង្គ្រាមជិតត្រូវពន្លត់ហើយ។
អ្នកជំនាញ ផ្នែកប៉ាតង់លោក Kim Yoo-chul ក៏ជាអ្នកដែលតែងតែឃ្លាំមើលព័ត៌មានជុំវិញ Samsung Electronics នោះ បានរាយការណ៍កាលពីដើមសប្ដាហ៍នេះថា ក្រុមហ៊ុនអេឡិចត្រូនិកយក្សដែលកំពុងប្រជែងយកទីផ្សារ Smart Device ស៊ីសាច់ហុតឈាមគ្នានេះ នឹងព្រមដាក់កាំបិតចុះរៀងៗខ្លួន មកផ្សះផ្សាគ្នាវិញ។ ប្រភពសំដីចេញពីជនអនាមិកម្នាក់បង្ហើបឱ្យដឹងដែរថា ក្រុមហ៊ុនដែលរកចំណេញពីអាជីវកម្មទូរសព្ទច្រើន ជាងគេទាំងពីរនេះ ថ្មីៗកន្លងទៅបានចាប់ផ្ដើមបើកកិច្ចពិភាក្សាគ្នា រកដំណោះស្រាយនូវជម្លោះប៉ាតង់ក្រៅប្រព័ន្ធតុលាការហើយ។
គួរ បញ្ជាក់ថា ព័ត៌មាននេះទទួលបានក្រោយពេលដែល Apple និង Google បានសម្រេចកិច្ចព្រមព្រៀងទម្លាក់ចោលបណ្ដឹងប៉ាតង់បច្ចេកវិទ្យារវាង គ្នារយៈពេល ២ឆ្នាំមកនេះចាប់តាំងពី Google បានទិញយក Motorola នៅឆ្នាំ២០១២។ ប្រសិនការចរចាត្រូវរ៉ូវគ្នា នោះនឹងបញ្ចប់បាននូវភាពចម្រូងចម្រាសដែលជាសង្គ្រាមប៉ាតង់តម្លៃ ថ្លៃ។
កាលពីឆ្នាំ២០១២ តុលាការរកឃើញ Samsung ល្មើសប៉ាតង់បច្ចេកវិទ្យារបស់ Apple ដោយបង្គាប់ឱ្យ Samsung សងជំងឺចិត្ត Apple ជាទឹកប្រាក់ប្រមាណ ១ពាន់លានដុល្លារអាមេរិក តែដោយមានការតវ៉ាពី Samsung ប្រាក់សំណងធ្លាក់មកនៅត្រឹម ៩៣០លានដុល្លារអាមេរិក ។ ចំណែកការសម្រេចក្ដីជម្លោះប៉ាតង់លើកទី២ ដែលជាករណីតូចមួយកាលពីខែមុន Apple ឈ្នះ Samsung បាន ១២០លានដុល្លារ ខណៈ ដែល Samsung ឈ្នះ Apple បានតែ ១៥៨.០០០ដុល្លារ ។