សូមអញ្ជើញទៅទទួលយកបទពិសោធន៍ដ៏ពិសេសមួយនាថ្ងៃចុងសប្តាហ៍ ជាមួយក្រុមគ្រួសារទាំងអស់ តាមរយៈពិព័រណ៍អឺរ៉ុប (EuroFair) ដំបូងគេនៅរាជធានីភ្នំពេញ។
អឺរ៉ុបនឹងមកបង្ហាញខ្លួនជូនលោកអ្នកទស្សនានៅចុងសប្តាហ៍ទី៤នៃខែមិថុនានេះហើយ! សូមលោកអ្នកត្រៀមខ្លួនចូលរួមទស្សនាពិព័រណ៍ដ៏អស្ចារ្យមួយនេះ ដើម្បីស្វែងយល់ពីលក្ខណៈដ៏ល្អប្រពៃនៃអឺរ៉ុបតាមរយៈពិព័រណ៍អឺរ៉ុបនេះ(EuroFair)។ លោកអ្នកអាចចូលទស្សនាពិព័រណ៍នេះដោយសេរី ទាំងអ្នកអាជីពដែលចង់ស្វែងរកដៃគូអាជីវកម្មឬផលិតផលល្អៗ ទាំងក្រុមគ្រួសារដែលចង់ដើរកម្សាន្តជាមួយគ្នា។ សូមអញ្ជើញទៅមជ្ឈមណ្ឌលពិព័រណ៍កោះពេជ្រអគារ K និង L ពីថ្ងៃទី២៩ ខែមិថុនា ដល់ថ្ងៃទី១ ខែកក្កដា ឆ្នាំ២០១៨!
អឺរ៉ុបនឹងមកដល់ប្រទេសកម្ពុជានៅចុងខែមិថុនានេះ!
មជ្ឈមណ្ឌលពិព័រណ៍កោះពេជ្រដ៏ល្បីល្បាញនៅរាជធានីភ្នំពេញ នឹងក្លាយជាទីតាំងពិព័រណ៍អឺរ៉ុប(EuroFair) ដំបូងគេបង្អស់ ដែលត្រូវបានរៀបចំដោយ សភាពាណិជ្ជកម្មអឺរ៉ុបនៅកម្ពុជា ឧបត្ថម្ភដោយ ក្រុមហ៊ុន Cambodia Airports និងទទួលការគាំទ្រពីគណៈប្រតិភូសហភាពអឺរ៉ុបប្រចាំកម្ពុជា ព្រមទាំងមានការចូលរួមពីសភាពាណិជ្ជកម្មជាតិនៃបណ្ដាប្រទេសនៅអឺរ៉ុបនិងសមាគមធុរកិច្ចចំនួនប្រាំនៅកម្ពុជា រួមមានសភាពាណិជ្ជកម្មបារាំង (CCIFC) សភាពាណិជ្ជកម្មអាល្លឺម៉ង់ (ADW) សភាពាណិជ្ជកម្មអង់គ្លេស (BritCham) សភាពាណិជ្ជកម្មអ៊ីតាលី (ICBA) និង សភាពាណិជ្ជកម្មអឺរ៉ុបខាងជើង (NordCham – ប្រទេសន័រវេ ដាណឺម៉ាក ស៊ុយអែត ហ្វាំងឡង់ និងអ៊ីស្លង់)។ សូមកុំឱ្យឱកាសនេះរំលងផុតទៅ ពីព្រោះថាលោកអ្នកអាចជួបអ្នកជំនាញមកពីក្រុមហ៊ុននិងអង្គការអឺរ៉ុបល្បីៗ និងអាចឃើញសេវាកម្មនិងផលិតផលម៉ាកល្បីៗដែលយើងយកពីអឺរ៉ុបមកតាំងនៅកម្ពុជា។ នេះក៏ជាឱកាសដ៏ល្អមួយដែរ ដែលលោកអ្នកអាចភ្លក់អាហារនិងភេសជ្ជៈអឺរ៉ុបឆ្ងាញ់ៗ។
លោក Arnaud Darc ប្រធានសភាពាណិជ្ជកម្មអឺរ៉ុបនៅកម្ពុជាបានថ្លែងថា៖ វាជាកិត្តិយសដ៏ធំធេងមួយសម្រាប់យើងក្នុងការរៀបចំពិព័រណ៍អឺរ៉ុប (EuroFair) ដំបូងគេបង្អស់មួយនេះនៅប្រទេសកម្ពុជា ។ នេះជាពិព័រណ៍ពាណិជ្ជកម្មលើកទីមួយដែលដាក់តាំងផលិតផលល្បីៗនិងសេវាកម្មល្អៗមកពីអឺរ៉ុប ជូនអ្នកប្រើប្រាស់ និងសហគ្រិនខ្មែរឱ្យបានស្គាល់។ ព្រឹត្តិការណ៍ដូចជា ពិព័រណ៍អឺរ៉ុប (EuroFair) នេះ ពិតជាជួយបង្កើតចំណងដ៏ល្អរវាង អឺរ៉ុបនិងកម្ពុជា ហើយក៏ផ្តល់នូវឱកាសពិសេសដើម្បីរៀនសូត្រ កសាងទំនាក់ទំនង និងពង្រីកខ្សែបណ្ដាញ បង្កើតមិត្តភក្តិ ស្គាល់អតិថិជន និងកសាងដៃគូអាជីវកម្មផងដែរ។ ពិព័រណ៍អឺរ៉ុប (EuroFair) នឹងក្លាយជាព្រឹត្តិការណ៍ និងពិព័រណ៍ដំបូងគេនៅប្រទេសកម្ពុជា ជួយជម្រុញបណ្ដូរពាណិជ្ជកម្មរវាងកម្ពុជានិងអឺរ៉ុប។
រហូតមកដល់ពេលនេះ មានប្រមាណជា៤០ក្រុមហ៊ុន មកពីអឺរ៉ុបបានចុះឈ្មោះចូលរួមតាំងពិព័រណ៍ផលិតផលរបស់ខ្លួន ហើយយើងសង្ឃឹមថា មានក្រុមហ៊ុនផ្សេងទៀតនឹងមកចូលរួមផងដែរ។ ក្រុមហ៊ុនដែលបានចុះឈ្មោះហើយ នឹងតាំងផលិតផលយានយន្ត គ្រឿងសង្ហារឹម ទំនិញប្រើប្រាស់ គ្រឿងម៉ាស៊ីន បរិក្ខារពេទ្យ ឱសថ សេវាកម្មហិរញ្ញវត្ថុ ចំណីអាហារ ភេសជ្ជៈ និងផលិតផលជាច្រើនមុខផ្សេងទៀត។ ម៉ាកល្បីៗ ជាច្រើនដូចជា BMW, Bosch, Eurasia Concept, Daas & Chemicals, Mercedes, Porsche, Thalias, Hops និង Wuerth ក៏មានវត្តមានដែរ ជាមួយនឹងការផ្តល់ជូននូវកម្មវិធីបញ្ចុះតម្លៃពិសេសៗ និងសកម្មភាពកម្សាន្តជាច្រើន ជូនអ្នកចូលរួមទស្សនា។ ទីតាំងអាហារដ្ឋានមួយនឹងត្រូវរៀបចំឡើងដើម្បីផ្តល់អាហារនិងភេសជ្ជៈបែបអឺរ៉ុបឆ្ងាញ់ពិសារជូនអ្នកទស្សនាផងដែរ។
លោក Aurelio Flacco ប្រធានរបស់សភាពាណិជ្ជកម្មអ៊ីតាលី ទើបត្រូវបានបង្កើតថ្មី និងជាសមាជិកសភាពាណិជ្ជកម្មអឺរ៉ុបនៅកម្ពុជា បានមានប្រសាសន៍ថា៖ នេះគឺជាលើកទីមួយហើយសម្រាប់កម្ពុជា និងជាឱកាសដ៏អស្ចារ្យមួយសម្រាប់សហគមន៍ធុរកិច្ចក្នុងស្រុក ដែលអាចស្វែងយល់បន្ថែមអំពីគុណភាពនៃទំនិញ និង សេវាកម្មដែលក្រុមហ៊ុនអឺរ៉ុបយកមកបង្ហាញជូន។ លោកបានបន្តថា៖ យើងនាំផលិតផលអ៊ីតាលីដ៏ល្អបំផុតដូចជា គ្រឿងសង្ហារឹម និង ផលិតផលប្រណីតៗ សម្រាប់តុបតែងក្នុងគេហដ្ឋានមានគុណភាពខ្ពស់ ដែលពុំធ្លាប់មានពីមុនមកនៅកម្ពុជា ដើម្បីផ្គត់ផ្គង់វិស័យសំណង់ដែលកំពុងរីកលូតលាស់។ ដើម្បីឈជើងជាអ្នកអភិវឌ្ឍន៍ ឬជាអ្នកសាងសង់ផ្ទះ លោកអ្នកត្រូវប្រឹងប្រែងក្នុងការទាក់ទាញអតិថិជន។ ម៉ាករបស់អឺរ៉ុបត្រូវបានគេទទួលស្គាល់ថាមានគុណភាពខ្ពស់តាំងពីយូរមកហើយ នេះគឺជាអ្វីដែលយើងនឹងបង្ហាញជូនក្នុងពិព័រណ៍នេះ។
កម្មវិធីនេះនឹងបើកឱ្យមហាជនចូលទស្សនាដោយសេរី។ ពិធីសម្ភោធបើកជាផ្លូវការ ក្រោមអធិបតីភាពរបស់ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នឹងប្រព្រឹត្តិទៅនៅថ្ងៃទី២៩ ខែមិថុនា វេលាម៉ោង៩ព្រឹក នៅកោះពេជ្រ អគារ K និង L។ នៅក្នុងរយៈពេលបីថ្ងៃនេះ កម្មវិធីកសាងទំនាក់ទំនងនឹងត្រូវរៀបចំឡើង ដោយមានការចូលរួមពីសំណាក់សហគមន៍ធុរកិច្ចខ្មែរ ព្រមទាំងបើកជូនអ្នកដែលចាប់អារម្មណ៍ចង់ជួបអ្នកដែលអាចក្លាយជាដៃគូធុរកិច្ច ឬមិត្តភក្តិ។
អំពីសភាពាណិជ្ជកម្មអឺរ៉ុប (EuroCham)
សភាពាណិជ្ជកម្មអឺរ៉ុបនៅកម្ពុជា (EuroCham Cambodia) ត្រូវបានសម្ភោធបង្កើតឡើងនៅថ្ងៃទី២ ខែមិថុនា ឆ្នាំ ២០១១ ដោយមានការគាំទ្រពីសភាពាណិជ្ជកម្មស្ថាបនិកប្រទេសអឺរ៉ុបចំនួនបី ពោលគឺ សភាពាណិជ្ជកម្មបារាំង-កម្ពុជា (CCFC) សភាពាណិជ្ជកម្មអាល្លឺម៉ង់ (ADW) និង សភាពាណិជ្ជកម្មអង់គ្លេស (BBAC)។ សភាពាណិជ្ជកម្មអឺរ៉ុបនៅកម្ពុជាត្រូវបានបង្កើតឡើងក្នុងគោលបំណងលើកកម្ពស់ធុរកិច្ចអឺរ៉ុបនៅកម្ពុជា ដោយជួយសម្រួលឱ្យក្រុមហ៊ុនអឺរ៉ុបចូលទៅទៅក្នុងទីផ្សារកម្ពុជា និងបង្កើតបណ្តាញគាំទ្រយ៉ាងទូលំទូលាយដល់សមាជិករបស់ខ្លួន ដែលជាប្រភេទក្រុមហ៊ុនសាជីវកម្ម និងសហគ្រាសឯកបុគ្គល។ ការងាររបស់សភាពាណិជ្ជកម្មអឺរ៉ុប រួមមានការងារសហការជាដៃគូជាមួយរាជរដ្ឋាភិបាលក្នុងវិស័យពន្ធដារ និងដំណោះស្រាយវិវាទ ការបង្កើតគណៈកម្មការលើវិស័យជាក់លាក់ និងការផ្ដល់សេវាកម្មទាក់ទងនឹងទីផ្សារដល់ក្រុមហ៊ុនអឺរ៉ុប។ សម្រាប់ព័ត៌មានបន្ថែមអំពីសភាពាណិជ្ជកម្មអឺរ៉ុប សូមចូលទៅកាន់គេហទំព័រ EuroCham Cambodia online។