បើតាមប្រភពពី TechCrunchបានឲ្យដឹងថាក្រុមហ៊ុន Apple កាលពីពេលថ្មីៗនេះ បានទិញយក ក្រុមហ៊ុនផលិតអំពូលភ្លើង LED តូចៗ សំរាប់អេក្រង់ LED ឈ្មោះ LuxVue ។ LuxVue មិនមានចេញមុខច្រើនទេនៅលើទីផ្សារ ឬសារព័ត៌មានតែក្រុមហ៊ុននេះបានដំណើរការងាររបស់ខ្លួនច្រើនឆ្នាំមកហើយ។ ប្រភព បានអោយដឹងថា Apple បានបញ្ចូលក្រុមការងារ LuxVue ទៅក្នុងក្រុមការងារធ្វើផ្នែករឹងរបស់ខ្លួន ហើយគេជឿថា Apple នឹងប្រើបច្ចេកវិទ្យារបស់ LuxVue ដើម្បីធ្វើអោយអេក្រង់របស់ ផលិតផលខ្លួនស៊ីភ្លើងតិច និងសន្សំសំចៃថ្ម បានកាន់តែច្រើន។
បើតាម VentureBeat បានរាយការណ៍ថា កាលពីឆ្នាំទៅមិញ LuxVue បានស្នើរសុំប៉ាតង់ជាច្រើន ទាក់ទងនឹងបច្ចេកវិទ្យាអំពូល LED តូចៗនេះ ហើយគេជឿថា ក្រុមហ៊ុននេះមានបច្ចេកវិទ្យា ដ៏អស្ចារ្យ ដែលអាចធ្វើអោយមានការផ្លាស់ប្តូរឧស្សាហកម្មអេក្រង់។
ចំណែកខាងក្រុមហ៊ុន Apple វិញបានបដិសេធមិនធ្វើការអត្ថាធិប្បាយទាក់ទងនឹងការទិញយករបស់ខ្លួននោះទេ។ គួររំលឹកថា អំឡុងពេលប្រកាសលទ្ធផលហិរញ្ញវត្ថុត្រីមាសទី 2 នាយកប្រតិបត្តិក្រុមហ៊ុន Apple លោក Tim Cooks បានប្រាប់ថា អំឡុងពេល 18 ខែនេះ ក្រុមហ៊ុន Apple បានទិញយកក្រុមហ៊ុនផ្សេងចំនួន 24 ក្រុមហ៊ុនហើយ៕
ប្រភព: TechCrunch