បន្ទាប់ពីមានការរីកចម្រើននូវបច្ចេកវិទ្យាស្មាតហ្វូនកើនឡើង និង មានក្រុមហ៊ុនស្មាតហ្វូនមួយចំនួនបានកើនឡើងដែរនោះ ធ្វើអោយការលក់ផលិតផលស្មាតហ្វូនរបស់ក្រុមហ៊ុនSamsungមានការធ្លាក់ចុះនៅក្នុងត្រីមាសទីពីរនៅក្នុងឆ្នាំ2014នេះ។
យោងតាមរបាយការណ៍ដែលចុះផ្សាយដោយ IDC បានអោយដឹងថាក្រុមហ៊ុនSamsungគឺនៅតែជាក្រុមហ៊ុនដែលស្ថិតនៅកម្រិតកំពូលក្នុងការផលិតផលស្មាតហ្វូន ប៉ុន្តែការលក់របស់ខ្លួនដូចជាការធ្លាក់ចុះ។
នៅក្នុងត្រីមាសទីពីរក្នុងឆ្នាំ2014នេះក្រុមហ៊ុនSamsung បានធ្វើការលក់សរុបនូវផលិតផលស្មាតហ្វូនរបស់ខ្លួនបានចំនួន 74.3 លានផលិតផលដែលនេះគឺជាតួរលេខធ្លាក់ចុះមួយបើប្រៀបទៅនិងត្រីមាសទីពីរកាលពីឆ្នាំ2013ដែលបានលក់ចេញរហូតដល់ 77.3 លានផលិតផលឯណោះ។ក្រុមហ៊ុនមានទីផ្សារភាគហ៊ុនរហូតដល់ 32.3 ភាគរយនៅក្នុងត្រីមាសទីពីរកាលពីឆ្នាំមុន ហើយសម្រាប់ត្រីមាសទីពីរនៅក្នុងឆ្នាំនេះគឺមានត្រឹមតែ 25.2 ភាគរយតែប៉ុណ្ណោះ។
ចំណែកឯការលក់របស់ក្រុមហ៊ុន Apple ទៅលើផលិតផលស្មាតហ្វូនវិញគឺមានការកើនឡើង ដោយមានចំនួន31.2 លាននៃផលិតផលស្មាតហ្វូននៅក្នងត្រីមាសទីពីរកាលពីឆ្នាំ 2013 បានកើនឡើងមកដល់ចំនួន 35.1 លានឧបករណ៍នៅក្នុងត្រីមាសទីពីរក្នុងឆ្នាំ 2014 នេះ ប៉ុន្តែទីផ្សារភាគហ៊ុនរបស់ពួកគេគឺត្រូវបានធ្លាក់មកត្រឹមតែ 11.9 ភាគរយក្នុងត្រីមាសទីពីរឆ្នាំ 2014ដោយមាន 13 ភាគរយកាលពីឆ្នាំ2013។
ក្រុមហ៊ុនទាំងពីរនេះត្រូវបានបាត់បង់នូវទីផ្សារភាគហ៊ុនរបស់ពួកគេដោយមានដៃគូរប្រកួតប្រជែងពីក្រុមហ៊ុនមួយចំនួនដូចជា Huawei, Lenovo និង LG ដោយក្រុមហ៊ុន Huawei បានរីកចម្រើនដោយកើនឡើងរហូតដល់ 95.1 ភាគរយពីមួយឆ្នាំទៅមួយឆ្នាំ ក្រុមហ៊ុន Lenovo បានកើនឡើងដល់ទៅ 38.7 ភាគរយ និងក្រុមហ៊ុន LG កើនដល់ 19.8 ភាគរយ។
ចំពោះទូរស័ព្ទស្មាតហ្វូនម៉ូដែលថ្មីរបស់ក្រុមហ៊ុនSamsungម៉ូដែល Samsung Galaxy S5 គឺត្រូវបានទទួលប្រជាប្រិយភាពដូចទៅនិងការរំពឹងទុករបស់ខ្លួននោះទេ ដោយពួកគេបានប្រឈមមុខនិងការកើនឡើងនូវការប្រកួតប្រជែងជាមួយនិងភាគីផ្សេងដូចជាស្មាតហ្វូនម៉ូដែលLG G3ជាដើម។
វាពិតជាពត៌មានមួយគួអោយចាប់អារម្មណ៍ក្នុងការទន្ទឹងរង់ចាំមើលនូវតួរលេខពេញមួយឆ្នាំថាតើនិងមានបំលាស់ប្តូរបែបណាចំពោះក្រុមហ៊ុន Samsung ថាតើខ្លួនអាចទទួលបានប្រជាប្រិយភាពជាងមុនដែររឺទេនៅចុងឆ្នាំ 2014 នេះនៅពេលដែលខ្លួនបានដាក់ចេញនូវម៉ូដែលថ្មីគឺ Galaxy Note 4 ក្នុងខែកញ្ញានេះ តើវាអាចបង្កើនការលក់របស់ខ្លួនដែររឺទេ?
ប្រភព៖ IDC , Android Central