[ចិន, 24 កក្កដាឆ្នាំ 2015]៖ ក្រុមហ៊ុន Huawei បានប្រកាសជាផ្លូវការនៅថ្ងៃនេះថា ពេលនេះក្រុមហ៊ុនយក្សលំដាប់ពិភពលោកមួយនេះបានក្លាយជាសមាជិកកំពូល (Platinum Member) និងជាធនធានសំខាន់បំផុតរបស់ The Open Group ដែលផ្តោតសំខាន់ទៅលើបច្ចេកវិទ្យាគមនាគមន៍ពត៌មានវិទ្យាលំដាប់ពិភពលោក Global ICT ដោយមានការចូលរួមពីក្រុមហ៊ុនពត៌មានវិទ្យា (IT) ល្បីល្បាញជាច្រើនដូចជាក្រុមហ៊ុន Capgemini, ក្រុមហ៊ុន HP, ក្រុមហ៊ុន IBM, ក្រុមហ៊ុន Oracle និងក្រុមហ៊ុន Philips ។
ខណៈពេលដែលវិស័យពត៌មានវិទ្យា និងបច្ចេកវិទ្យាកំពុងតែរីកចម្រើនលូតលាស់ទៅមុខយ៉ាងឆាប់រហ័សស្ទើរតែមិនគួរឲ្យជឿដែលមានដូចជា Cloud Storage (សម្រាប់ផ្ទុកទិន្នន័យធំៗ) ក៏ដូចជាមជ្ឈមណ្ឌលទិន្នន័យជាច្រើនទៀត ដែលធ្វើឲ្យក្រុមហ៊ុនធំៗងាកមកវិនិយោគទៅលើវិស័យទាំងអស់នេះដែលកំពុងតែមានទីផ្សារយ៉ាងគំហុកនៅក្នុងសតវត្សទី 21 នេះ។
The Open Group ជាក្រុមហ៊ុនដែលល្បីល្បាញនៅលើពិភពលោកដែលមានគោលបំណងក្នុងការពង្រឹងសមិទ្ធិផលនៃអាជីវកម្មរបស់ខ្លួនតាមរយៈវិស័យពត៌មានវិទ្យាតាមរយៈវេទិកាជាច្រើន ការធ្វើការជាក្រុម ការផ្តល់នូវវិញ្ញាបនប័ត្រ និងព្រឹត្តិការណ៍មួយចំនួនទៀតបានធ្វើឲ្យ The Open Group ក្លាយជាអ្នកបង្កើនការពង្រីកអាជីវកម្ម ជាពិសេស “លំហូរនៃវិស័យពត៌មានវិទ្យា ICT”។
លោក Allen Brown ដែលជាអគ្គនាយក និងប្រធានប្រតិបត្តិរបស់ក្រុមហ៊ុន The Open Group បានថ្លែងឲ្យដឹងថា “វាជាក្តីសោមនស្សរីករាយបំផុត ហើយយើងសូមស្វាគមន៍ដល់ក្រុមហ៊ុន Huawei ដែលក្លាយជាសមាជិកកំពូល (Platinum Member) របស់ The Open Group ។ ការចូលរួមចំណែកជាច្រើនដែលក្រុមហ៊ុននេះបានធ្វើរួចហើយ និងកិច្ចការជាច្រើនដែលកំពុងតែធ្វើមានដូចជាវេទិកាជាច្រើន និងការធ្វើការជាក្រុមគឺពិតជាមានសារៈប្រយោជន៍យ៉ាងខ្លាំងក្នុងការអភិវឌ្ឍស្តង់ដារវិស័យពត៌មានវិទ្យានៅលើពិភពលោក។ ការចូលរួមជាសមាជិក Platinum របស់ក្រុមហ៊ុន Huawei នឹងក្លាយជាផ្នែកមួយដ៏សំខាន់សម្រាប់ការសម្រេចបាននូវបេសកកម្មរបស់ The Open Group នេះ។”
លោក Howard Liang ដែលជាប្រធានផ្នែកសេវាបច្ចេកទេស (Global Technical Services) របស់ក្រុមហ៊ុន Huawei និយាយថា “ក្រុមហ៊ុន Huawei នឹងបង្កើនការអនុវត្តន៍ក្នុងសហគ្រាសស្ថាបត្យកម្មដ៏ល្អបំផុតជាមួយនឹង The Open Group ដើម្បីស្វែងរកគោលការណ៍ណែនាំមួយ និងវិធីសាស្រ្តដើម្បីដោះស្រាយបញ្ហាប្រព័ន្ធយុទ្ធសាស្រ្តអាជីវកម្ម និងការប្រកួតប្រជែងវិស័យពត៌មានវិទ្យា។ យើងនឹងផ្តល់នូវចំណេះដឹងបទពិសោធន៍ និងជំនាញរបស់យើងនៅក្នុងបច្ចេកវិទ្យា ICT និងប្រព័ន្ធឌីជីថលដើម្បីជួយសម្រេចនូវអាជីវកម្មប្រកបដោយស្តង់ដារ និងល្អគ្មានគូប្រៀបនៅ The Open Group សម្រាប់អតិថិជនរបស់យើង។”
ចំនែកលោក Xuemin Wang ដែលជាប្រធានស្តង់ដារ និងការអភិវឌ្ឍឧស្សាហកម្ម (Standards & Industry Development) ប្រចាំក្រុមហ៊ុន Huawei បានថ្លែងថា “ស្តង់ដារ និងក្របខ័ណ្ឌស្ថាបត្យកម្មរបស់ The Open Group គឺពិតជាមានតម្លៃបំផុតក្នុងវិស័យឧស្សាហកម្មពត៌មានវិទ្យា។ យើងពិតជាមានមោទនភាពណាស់ដែលបានក្លាយជាសមាជិក Platinum Member របស់ The Open Group។ យើងនឹងគាំទ្រយ៉ាងពេញទំហឹងដើម្បីគាំទ្រទៅលើស្ថាបត្យកម្មបច្ចេកវិទ្យាគមនាគមន៍ពត៌មានវិទ្យា ការការពារសន្តិសុខតាមប្រព័ន្ធអ៊ីនធឺណេត និងការពង្រឹងដំណើរការវិស័យ ICT ផងដែរ។”
លោក Chris Forde ដែលជាអ្នកគ្រប់គ្រងទូទៅ និងជាអនុប្រធានគ្រប់គ្រងតំបន់ប៉ាស៊ីភិចផ្នែកស្ថាបត្យកម្មរបស់ The Open Group បានបង្ហាញពីក្តីរីករាយចំពោះការប្រកាសនេះថា “យើងពិតជាមានក្តីសោមនស្សរីករាយខ្លាំងណាស់ក្នុងការរួមបញ្ចូលឈ្មោះក្រុមហ៊ុន Huawei ជាសមាជិក Platinum របស់ The Open Group ។ ការរួមចំណែកនេះពិតជាពង្រឹងស្តង់ដារនៃការផ្តល់សេវាទូគមនាគមន៍ពត៌មានវិទ្យានៅតំបន់អាស៊ី។ ខណៈពេលដែលយើងបន្តរអភិវឌ្ឍនៅក្នុងតំបន់និងកំពុងតែឈានមុខគេផ្នែក ICT វាពិតជាសំខាន់ណាស់ក្នុងការពង្រឹងស្តង់ដាររបស់យើងជាមួយនឹងក្រុមហ៊ុន Huawei ដែលកំពុងតែឈានមុខគេនោះ៕”