ក្រុមហ៊ុន Samsung ទើបតែបង្ហាញនូវស្មាតហ្វូន Samsung Galaxy S7 នៅក្នុងព្រឹត្តិការណ៍ MWC (Mobile World Congress) នៅក្នុងទីក្រុងបាសេឡូណា ប្រទេសអេស្ប៉ាញ។ ស្មាតហ្វូននេះបានបំពាក់នូវមុខងារ និងបច្ចេកវិទ្យាថ្មីៗជាច្រើនដែលនៅលើ iPhone 6s មិនមាននោះទេ។ ពេលនេះ យើងនឹងលើកយកចំណុចទាំង 5 ដែលស្មាតហ្វូន Galaxy S7 “មាន” ចំនែក iPhone 6s “មិនមាន”។
អេក្រង់ AMOLED កម្រិតខ្ពស់បំផុត
ស្មាតហ្វូន Galaxy S7 និង Galaxy S7 Edge សុទ្ធតែធ្វើការបំពាក់នូវអេក្រង់ថ្មីរបស់ខ្លួន។ អេក្រង់ថ្មីនេះគឺ Super AMOLED កម្រិតភាពច្បាស់ 2560 x 1440 ដែលបង្ហាញរូបភាពបានច្បាស់ល្អជាង iPhone 6s និង iPhone 6s Plus ។ ប្រភពព័ត៌មានមួយចំនួនបញ្ជាក់ថា នៅថ្ងៃអនាគត iPhone គ្រោងនឹងធ្វើការផ្លាស់ប្តូរអេក្រង់ប្រើ AMOLED នេះវិញម្តង។
“អ្វីគ្រប់យ៉ាង” នៅលើអេក្រង់
បច្ចេកវិទ្យាអេក្រង់ AMOLED អនុញ្ញាត្តឱ្យអ្នកប្រើប្រាស់អាចធ្វើការដាក់ព័ត៌មានមួយចំនួននៅលើអេក្រង់បានយ៉ាងងាយស្រួលដូចជាកាលបរិច្ឆេទ (Date) ពេលវេលា (Time) និងសាររំលឹក (Notifications) ផងដែរដោយមិនចាំបាច់ដោះសោរទូរស័ព្ទនោះទេ។ បើនៅលើ iPhone វិញ អ្នកប្រើប្រាស់ត្រូវតែធ្វើការចុចប៊ូតុង Wake Display សិនទើបអាចមើលម៉ោង ឬសាររំលឹកបាន។
អង្គចងចាំទ្វេដង
ទូរស័ព្ទ iPhone 6s បំពាក់នូវអង្គចងចាំ (RAM) ទំហំត្រឹមតែ 2GB ចំនែកទូរស័ព្ទ Galaxy S7 បំពាក់នូវអង្គចងចាំ (RAM) ទំហំ 4GB ។ អ្វីដែលកាន់តែគួរឱ្យចាប់អារម្មណ៍ជាងនេះទៀតនោះ ប្រព័ន្ធដំណើរការរបស់ Galaxy S7 ជាមួយនឹងទំហំ RAM ធំនេះមិនធ្វើឱ្យម៉ាស៊ីនគាំងដូចជំនាន់មុនៗនោះទេ។
ប្រព័ន្ធការពារធូលី និងការជ្រាបទឹក
ទូរស័ព្ទ Galaxy S7 ទទួលស្គាល់នូវវិញ្ញាប័ណ្ណបត្រ IP68 ទៅលើប្រព័ន្ធការពារធូលី និងការជ្រាបទឹកដែលមានន័យថា វាអាចស្ថិតនៅក្រោមទឹករយៈពេល 30 នាទីជម្រៅ 1.5 ម៉ែត្រដោយគ្មានបញ្ហា។ ចំនែក ទូរស័ព្ទ iPhone វិញបើត្រូវទឹកគឺខូចតែម្តង ព្រោះវាមិនបានទទួលវិញ្ញាប័ណ្ណបត្រដូចទូរស័ព្ទ Galaxy S7 ។
កាមេរ៉ាភិចសែលធំ
កាមេរ៉ាភិចសែលរបស់ទូរស័ព្ទ Galaxy S7 គឺ 30% ប្រសើរជាងកាមេរ៉ាភិចសែលរបស់ iPhone 6s Plus ។ Apple ប្រើប្រស់ត្រឹមតែ 1.22 micron ចំនែក Samsung ប្រើប្រាស់ 1.4 micron ។