ថ្មីៗនេះ ក្រុមហ៊ុនបច្ចេកវិទ្យាយក្ស Samsung សមេ្រចចិត្តក្នុងការបង្កើតនូវឧបករណ៍បច្ចេកវិទ្យាថ្មីមួយទៀតឈ្មោះថា DeX Station Dock សម្រាប់ប្រើប្រាស់ជាមួយនឹងស្មាតហ្វូនស៊េរីថ្មី Galaxy S8 និង Galaxy S8+ ។ ឧបករណ៍បច្ចេកវិទ្យាថ្មីនេះដាក់លក់នៅក្នុងតម្លៃ 129.99 ដុល្លារដោយចាប់ផ្តើមពីថ្ងៃនេះហើយនៅលើគេហទំព័រក្រុមហ៊ុនចែកចាយ Clove ។

ចំនែកការកម្មង់ទិញមុននៅសហរដ្ឋអាមេរិចសម្រាប់ឧបករណ៍បច្ចេកវិទ្យាថ្មីនេះមានតម្លៃ 149.99 ដុល្លារ។ DeX Station Dock សម្រាប់ប្រើប្រាស់ជាមួយនឹងស្មាតហ្វូនស៊េរីទំនើបទាំងពីរម៉ូដែលរបស់ក្រុមហ៊ុនបច្ចេកវិទ្យា Samsung ដែលអាចភ្ជាប់ជាមួយនឹង Keyboard, Monitor និង Mouse ។

ឧបករណ៍នេះអាចប្រែក្លាយជាកុំព្យូទ័រមួយដ៏មានសមត្ថភាពដែលអាចធ្វើកិច្ចការងារបានច្រើនជាមួយនឹងកម្មវិធីថ្មីៗ និងកម្មវិធីសម្រាប់ប្រើប្រាស់នៅក្នុងការិយាល័យ។ លោកអ្នកអាចប្រើប្រាស់ឧបករណ៍នេះសម្រាប់ប្រើប្រាស់ជាមួយនឹងកម្មវិធី Microsoft, Adobe, VMwave និង Citrix បានយ៉ាងងាយស្រួល៕