គណៈកម្មការពាណិជ្ជកម្មបានប្រកាសពីការទូទាត់តម្លៃ ៥ ពាន់លានដុល្លារជាមួយហ្វេសប៊ុក (FB) កាលពីថ្ងៃពុធដើម្បីដោះស្រាយការស៊ើបអង្កេតអំពីរបៀបដែលក្រុមហ៊ុនបានបាត់បង់ការគ្រប់គ្រងលើទិន្នន័យដ៏ធំរបស់ខ្លួន។ វាជាការផាកពិន័យដ៏ធំបំផុតនៅក្នុងប្រវតិ្តសាស្រ្ត FTC ហើយនេះគ្រាន់តែជាប្រាក់ចំណេញប្រហែលមួយខែសំរាប់ Facebook ។កិច្ចព្រមព្រៀងនេះបានកើតឡើងចំពេលមានការអំពាវនាវកាន់តែច្រើនឡើងនៅទីក្រុងវ៉ាស៊ីនតោន សម្រាប់តម្លាភាពនិងគណនេយ្យភាពសម្រាប់ក្រុមហ៊ុនបច្ចេកវិទ្យាដែលមានឥទ្ធិពលលើចលនាសង្គមនិងព័ត៌មានផ្ទាល់ខ្លួនកាន់តែខ្លាំងឡើងដែលវាត្រូវបានគេមើលឃើញថាមានគ្រោះថ្នាក់ដោយសារតែមានអ្នកនយោបាយក៏ប្រើប្រាស់ហ្វេសប៊ុកដែរ។
ហ្វេសប៊ុកបានយល់ព្រមលើកិច្ចព្រមព្រៀងនេះបន្ទាប់ពីមានការបំពានលើការអនុវត្តសិទ្ធិឯកជនរបស់ក្រុមហ៊ុនដូចជាការផ្សព្វផ្សាយព័ត៌មានអ្នកប្រើរហូតដល់ ៨៧ លាននាក់ដោយចៃដន្យទៅក្រុមហ៊ុន Cambridge Analytica ។FTC ចោទប្រកាន់ថា Facebook បានប្រើប្រាស់ការលាតត្រដាងនិងការបំភាន់ដែលធ្វើឱ្យប៉ះពាល់ដល់សិទ្ធិឯកជនរបស់អ្នកប្រើប្រាស់ដោយរំលោភលើកិច្ចព្រមព្រៀងដែល Facebook បានចុះហត្ថលេខាជាមួយគណៈកម្មការនៅឆ្នាំ ២០១២ ។
លោកចូសេហ្វស៊ីម៉ុន (Joseph Simons) បាននិយាយនៅក្នុងសេចក្តីថ្លែងការណ៍មួយថា “ទំហំនៃការពិន័យចំនួន ៥ ពាន់លានដុល្លារគឺមិនធ្លាប់មានពីមុនមកទេនៅក្នុងប្រវត្តិសាស្ត្ររបស់ FTC” ។ សេចក្តីប្រកាសរបស់ FTC កាលពីថ្ងៃពុធបានបញ្ជាក់ថា នាយកប្រតិបត្តិរបស់ក្រុមហ៊ុន FB លោក Mark Zuckerberg បាននិយាយថា “យើងបានយល់ព្រមបង់ពិន័យ ប៉ុន្តែសំខាន់ជាងនេះទៅទៀតយើងនឹងធ្វើឱ្យមានការផ្លាស់ប្ដូរតាមលំដាប់មួយចំនួនចំពោះរបៀបដែល យើងមានការទទួលខុសត្រូវក្នុងការការពារភាពឯកជនរបស់ប្រជាជន យើងបានធ្វើការយ៉ាងលំបាកដើម្បីបំពេញតាមការទទួលខុសត្រូវនេះប៉ុន្តែឥឡូវនេះយើងនឹងកំណត់នូវស្តង់ដារថ្មីរបស់យើង។ “
ភាគហ៊ុនរបស់ Facebook បានធ្លាក់ចុះបន្តិចនៅពេលទីផ្សារបានបើកនៅព្រឹកថ្ងៃពុធ។ បន្ថែមពីលើការពិន័យរដ្ឋប្បវេណីហ្វេសប៊ុកក៏បានយល់ព្រមទទួលយកការគ្រប់គ្រងកាន់តែច្រើននៃការអនុវត្តសិទ្ធិឯកជនរបស់ខ្លួន។ ក្រោមកិច្ចព្រមព្រៀង FTC ក្រុមប្រឹក្សាភិបាលហ្វេសប៊ុកនឹងបង្កើតគណៈកម្មាធិការត្រួតពិនិត្យភាពឯកជនដែលបង្កើតឡើងដោយសមាជិកឯករាជ្យដែលមិនអាចត្រូវបានបណ្តេញចេញដោយ Zuckerberg តែម្នាក់ឯង។ គណៈកម្មាធិនោះនឹងតែងតាំងមន្រ្តីដទៃទៀតដើម្បីបញ្ជាក់ថា Facebook កំពុងអនុវត្តតាមកិច្ចព្រមព្រៀង FTC ។
ហ្វេសប៊ុកក៏បានប្រឈមនឹងសំនួរយ៉ាងខ្លាំងពីសភាកាលពីសប្តាហ៍មុន គណៈកម្មាធិការដទៃទៀតបានពិនិត្យមើលផែនការរបស់ Facebook ក្នុងការដាក់ចេញនូវរូបិយប័ណ្ណឌីជីថល Libra ដោយមានការជជែកវែកញែកជាច្រើនថាហ្វេសប៊ុកត្រូវកែទម្រង់ខ្លួនឯងមុនពេលរំខានប្រព័ន្ធហិរញ្ញវត្ថុសកល។
