Galaxy Round ជាទូរស័ព្ទដំបូងបង្អស់របស់ក្រុមហ៊ុន Samsung ដែលអាចបត់បាននឹងធ្វើពីកញ្ចក់ជាមួយនឹងផ្លាស្ទិចដែលផលិតនៅឆ្នាំ 2013 ។ ចាប់តាំងពីពេលនោះមក វាបានស្ងប់ស្ងាត់ទៅវិញ ព្រោះ Samsung សម្រុកផលិតចេញនូវកំពូលស្មាតហ្វូន Galaxy S6 Edge និង Edge+ ជាពិសេស Note Edge ដ៏អស្ចារ្យ និងល្បីល្បាញបំផុតនាពេលបច្ចុប្បន្ន។

ទូរស័ព្ទដែលអាចបត់បានកំពុងក្លាយជាប្រធានបទថ្មីនាពេលបច្ចុប្បន្នសម្រាប់ក្រុមហ៊ុនបច្ចេកវិទ្យាធំៗដែលខិតខំប្រឹងប្រែងក្នុងការច្នៃម៉ូដឱ្យមានរូបរាងតូចល្មមសម្រាប់ដាក់ក្នុងហោប៉ាវ និងាយស្រួលយកតាមខ្លួន។ គម្រោងថ្មីមួយដែលក្រុមហ៊ុន Samsung កំពុងតែធ្វើមានឈ្មោះថា Samsung Project V(Valley) ដែលនឹងធ្វើការសាកល្បងប្រើប្រាស់នៅដើមខែមករាឆ្នាំក្រោយនេះ។

ទូរស័ព្ទដែលអាចបត់បាននេះនឹងបំពាក់នូវ CPU ចំនួនពីរគឺ Snapdragon 620 និង​820 អង្គចងចាំ RAM ទំហំ 3GB រន្ធដោត microSD កាត និងជាប្រភេទទូរស័ព្ទដែលមិនអាចដោះថ្មចេញបាននោះទេ។ Samsung Project V នឹងផលិតនូវស្មាតហ្វូនដែលអាចបត់បានរាងឡូយទាន់សម័យ និងបំពាក់បច្ចេកវិទ្យាថ្មីៗបំផុត។ យ៉ាងណាមិញ ដៃគូប្រកួតប្រជែងក្នុងការផលិតនូវស្មាតហ្វូនដែលអាចបត់បាននេះក៏មានក្រុមហ៊ុន LG មួយទៀតដែលបានប្រកាសថានឹងបង្ហាញនូវស្មាតហ្វូនដែលអាចបត់បាននៅឆ្នាំក្រោយនេះ។

យើងនឹងរង់ចាំមើលទាំងអស់គ្នា។ តោះទៅទស្សនាវីដេអូទូរស័ព្ទដែលអាចបត់បានរបស់ Samsung បន្តិចមើល៖

ប្រភព​៖ BusinessKorea