ថ្មីៗនេះ ក្រុមហ៊ុនបច្ចេកវិទ្យា Lenovo ទើបតែបញ្ចេញនូវ Patches សុវត្ថិភាពថ្មីសម្រាប់ការពារទៅលើភាពរងគ្រោះធ្ងន់ធ្រនៅក្នុងកម្មវិធីស្កេនក្រយ៉ៅដៃ Fingerprint Manager Pro software ដែលអាចអនុញ្ញាតឱ្យព័ត៌មានសំខាន់របស់អ្នកប្រើប្រាស់ជាច្រើនបែកធ្លាយផងដែរ។
Fingerprint Manager Pro គឺជាកម្មវិធីសម្រាប់ពង្រឹងសមត្ថភាពនៅលើប្រព័ន្ធប្រតិបត្តិការ Microsoft Windows 7, 8 និង 8.1 ដែលអនុញ្ញាតឱ្យអ្នកប្រើប្រាស់ជាច្រើនធ្វើការ Log in ចូលទៅក្នុងកុំព្យូទ័រ Lenovo PCs ដោយប្រើប្រាស់នូវស្នាមម្រាមដៃរបស់ពួកគេ។ កម្មវិធីនេះអាចធ្វើការតភ្ជាប់ទៅកាន់ព័ត៌មានសំខាន់ៗដែលរក្សាទុកនៅលើវេបសាយ និងការផ្ទៀងផ្ទាត់តាមវេបសាយតាមរយៈការប្រើប្រាស់ស្នាមក្រយ៉ៅដៃនោះ។
បន្ថែមពីលើទិន្នន័យនៃស្នាមក្រយ៉ៅដៃនោះ កម្មវិធីនេះក៏ធ្វើការរក្សាទុកនូវព័ត៌មានសំខាន់ៗរបស់អ្នកប្រើប្រាស់ជាច្រើនដូចជាទិន្នន័យ Windows login ជាដើម។ តាមការបញ្ជាក់របស់ក្រុមហ៊ុននេះ Fingerprint Manager Pro version 8.01.86 និងជំនាន់មុននេះមានចំណុចរងគ្រោះទៅលើលេខសម្ងាត់ដែលត្រូវគេស្គាល់ឈ្មោះថា CVE-2017-3762 ដែលធ្វើឱ្យកម្មវិធីនេះអាចប្រើប្រាស់បានជាមួយនឹងការចូលប្រើប្រាស់ទោះបីជាមិនមែនជា Administrative ក៏ដោយ។
ចំណុចរងគ្រោះនេះអាចប៉ះពាល់ទៅដល់ Lenovo ThinkPad, ThinkCentre និង ThinkStation laptops ហើយវាប៉ះពាល់ទៅដល់ម៉ូដែលរបស់ Lenovo ThinkPad ច្រើនជាង 24 ម៉ូដែល, ThinkStation ច្រើនជាង 5 ម៉ូដែល, ThinkCentre ច្រើនជាង 8 ម៉ូដែលដែលដំណើរការប្រព័ន្ធប្រតិបត្តិការ Windows 7, 8 និង 8.1 ។
នេះគឺជាឧបករណ៍របស់ក្រុមហ៊ុន Lenovo ដែលអាចប្រើប្រាស់ជាមួយនឹងកម្មវិធី Fingerprint Manager Pro ហើយវាមានចំណុចរងគ្រោះនេះ៖
ThinkPad L560
ThinkPad P40 Yoga, P50s
ThinkPad T440, T440p, T440s, T450, T450s, T460, T540p, T550, T560
ThinkPad W540, W541, W550s
ThinkPad X1 Carbon (Type 20A7, 20A8), X1 Carbon (Type 20BS, 20BT)
ThinkPad X240, X240s, X250, X260
ThinkPad Yoga 14 (20FY), Yoga 460
ThinkCentre M73, M73z, M78, M79, M83, M93, M93p, M93z
ThinkStation E32, P300, P500, P700, P900
ក្រុមហ៊ុនបច្ចេកវិទ្យា Lenovo ក៏ផ្តល់រង្វាន់ដល់អ្នកស្រាវជ្រាវ Jackson Thuraisamy ដែលរកឃើញ និងរាយការណ៍អំពីចំណុចរងគ្រោះនេះ។ ក្រុមហ៊ុនបច្ចេកវិទ្យាដ៏ពេញនិយមនៅក្នុងប្រទេសចិននេះជូនដំណឹងទៅកាន់អ្នកប្រើប្រាស់ ThinkPad អោយធ្វើការ Update ទៅលើកម្មវិធី Fingerprint Manager Pro version 8.01.87 ឬខ្ពស់ជាងនេះដើម្បីដោះស្រាយបញ្ហានេះ។ សម្រាប់កុំព្យូទ័រ Lenovo ដែលដំណើរការប្រព័ន្ធប្រតិបត្តិការ Windows 10 មិនឆ្លងចំណុចរងគ្រោះនេះនោះទេ៕