ថ្មីៗនេះ ក្រុមហ៊ុនបច្ចេកវិទ្យា Huawei បានប្រកាសបង្ហាញនូវផលិតផលជាច្រើននៅក្រោមឈ្មោះ  ‘Mate’ series ដែលមានដូចជាស្មាតហ្វូនត្រកូល Mate, កុំព្យូទ័រ Notebooks, ថេប្លេត និងពាណិជ្ជសញ្ញាថ្មីមួយទៀតដែលនេះគឺជាការបង្ហាញថា​ក្រុមហ៊ុនបច្ចេកវិទ្យានេះមានគម្រោងក្នុងការបន្ថែមនូវផលិតផលថ្មីនៅក្នុងក្រុមនេះជាមួយនឹងឈ្មោះថា ‘MatePod’ ។

តាមការបញ្ជាក់របស់ LetsGoDigital  នោះ​ក្រុមហ៊ុនបច្ចេកវិទ្យា Huawei ក៏ស្នើសុំនូវពាណិជ្ជសញ្ញាទៅកាន់  EUIPO (European Union Intellectual Property Office) និង UK IPO កាលពីថ្ងៃទី ៦ ខែមករា ឆ្នាំ ២០២០ សម្រាប់ឈ្មោះ  ‘MatePod’ សម្រាប់កាសស្តាប់ថ្មី។ សម្រាប់ឈ្មោះនៃផលិតផលនេះគឺបញ្ចេញមកក្រោយពេលដែលក្រុមហ៊ុនប្រកាសបង្ហាញនូវថេប្លេតHuawei MatePad ចុងក្រោយបង្អស់របស់ក្រុមហ៊ុននេះ។ ក្រុមហ៊ុនមានគម្រោងក្នុងការប្រកាសបង្ហាញនូវកាសស្តាប់ជំនាន់ក្រោយនេះជា MatePod ជាជាងការបន្តបញ្ចេញនូវកាសស្តាប់ t FreeBuds series នោះ ប៉ុន្តែវានៅមិនទាន់មានការបញ្ជាក់ជាផ្លូវការនៅឡើយទេ។

កាលពីឆ្នាំមុននេះ ក្រុមហ៊ុន  Huawei  ក៏ប្រកាសបង្ហាញនូវស្មាតហ្វូន  P30 flagship  ហើយវាក៏មានការប្រកាសបង្ហាញនូវ FreeLace wireless earphones  ស៊េរីថ្មីជាមួយនឹង  lite version FreeBuds ផងដែរ។ សម្រាប់ឆ្នាំ ២០២០ នេះ ក្រុមហ៊ុនបច្ចេកវិទ្យា Huawei គឺមានគម្រោងក្នុងការប្រកាសបង្ហាញនូវ Huawei P40 series នៅក្នុងខែមីនានេះ ហើយកាសស្តាប់នេះនឹងបង្ហាញខ្លួនមកជាមួយផងដែរ៕