លោក Richard Yu នាយកប្រតិបត្តិក្រុមហ៊ុន Huawei Consumer Business Group ថ្មីៗនេះព្យាករណ៍ពីការលក់ស្មាតហ្វូនប្រចាំឆ្នាំរបស់ក្រុមហ៊ុនរបស់លោក ហើយនៅក្នុងសន្និសីទកាសែតមួយនៅទីក្រុង Shenzhen ប្រទេសចិនលោកនិយាយពីការអនុវត្តទូទៅរបស់ក្រុមហ៊ុន Huawei នៅឆ្នាំ ២០១៩ ផងដែរ។

លោក Yu ប្រាប់ថាការដឹកជញ្ជូនស្មាតហ្វូនរបស់ក្រុមហ៊ុន Huawei បានវ៉ាដាច់ក្រុមហ៊ុន Apple ក្លាយជាក្រុមហ៊ុនផលិតស្មាតហ្វូនធំលំដាប់ទី ២ នៅលើពិភពលោកទាក់ទងនឹងបរិមាណនៃការដឹកជញ្ជូន និងបង្កើនភាគហ៊ុនក្នុងនាមជាក្រុមហ៊ុនផលិតស្មាតហ្វូនកំពូលរបស់ប្រទេសចិន។ គួរបញ្ជាក់ផងដែរថាក្រុមហ៊ុន Huawei បានក្លាយជាក្រុមហ៊ុនផលិតនាឡិកាឆ្លាតវៃ និងកាសស្តាប់ត្រចៀកធំជាងគេនៅក្នុងប្រទេសចិនផងដែរ។

លោកក៏លើកឡើងពីការរីកចម្រើនរបស់ក្រុមហ៊ុន Huawei នៅក្នុងទីផ្សារថេប្លេតនិងដណ្តើមបានចំណាត់ថ្នាក់ទី ១ នៅក្នុងទីផ្សារថេប្លេតរបស់ប្រទេសចិនតាមរយៈការកាត់ផ្តាច់ Apple ។ ម៉្យាងវិញទៀតលោកព្យាករណ៍ថា notebooks របស់ក្រុមហ៊ុន Huawei អាចនឹងទទួលបានចំណាត់ថ្នាក់កំពូលផងដែរ។ ប៉ុន្មានថ្ងៃមុនលោក Yu និយាយថានៅឆ្នាំនេះការដឹកជញ្ជូនស្មាតហ្វូនទូទាំងពិភពលោករបស់ក្រុមហ៊ុន Huawei នឹងមានប្រមាណ ២៣០ លានគ្រឿងជាមួយនឹងការកើនឡើង ១២ ភាគរយ។

កាលពីខែតុលាក្រុមហ៊ុន Huawei ប្រកាសការនាំចេញស្មាតហ្វូនចំនួន ២០០ លានគ្រឿងដែលមានរយៈពេល ៦៤ ថ្ងៃលឿនជាងឆ្នាំមុន។ ជាមួយនឹងការរក្សាកំណត់ត្រានេះ នៅថ្ងៃទី ៣០ ខែឧសភាក្រុមហ៊ុននាំចេញស្មាតហ្វូនលើស ១០០ លានគ្រឿង។ យោងតាមរបាយការណ៍លទ្ធផលត្រីមាសទី ៣ ពីក្រុមហ៊ុន Canalys ក្រុមហ៊ុន Huawei ដណ្តើមបាន ៤០ ភាគរយនៃទីផ្សារស្មាតហ្វូនចិនសរុប និងជាក្រុមហ៊ុនផលិតស្មាតហ្វូនតែមួយគត់ដែលមើលឃើញពីកំណើនអាជីវកម្មនេះ។ ក្រុមហ៊ុនបច្ចេកវិទ្យាយក្សចិននៅតែបន្តកើនឡើងទាំងទីផ្សារក្នុងប្រទេសចិន និងពិភពលោកផងដែរ៕