ព័ត៌មាន

Nokia បង្ហាញពីទូរលេខចេញលក់ Lumia Smartphone នៅត្រីមាសទីពីរ

         ក្រុមហ៊ុន Nokia សម្រាប់​ត្រីមាសនីមួយៗតែងតែ​បង្ហាញ​ពី​លទ្ធផល​ហរិញ្ញវត្ថុ ដែល​ពេលនេះ​បានបង្ហាញ​ពី​លទ្ធផល​ហរិញ្ញវត្ថុ​នៅ​ត្រីមាស​ទី​ពីរ​ឆ្នាំ ២០១៣ នេះ ដោយ​ទូរលេខ​បង្ហាញថា ការប្រើប្រាស់​ស្មា​ត​ហ្វូ​ន​របស់ Nokia មានការ​កើនឡើង​ជាង​ត្រីមាស​កន្លងមកនេះ។

         សម្រាប់​ត្រីមាស​ទី​ពីរ​ឆ្នាំ ២០១៣ នេះ ការចេញលក់​ស្មា​ត​ហ្វូ​ន Lumia ដែល​ដំណើរការ​ដោយ​ប្រព័ន្ធ​ប្រតិបត្តិ​ការណ៍ Windows Phone មាន​ចំនួន​ដល់​ទៅ 7.4 លាន​គ្រឿង ដែល​កាលពី​ត្រីមាស​ទីមួយ បានត្រឹមតែ 5.6 លាន​គ្រឿង​ប៉ុណ្ណោះ ហើយ​បើ​ប្រៀបធៀប​ទៅនឹង​ត្រីមាស​ដូចគ្នា​កាលពី​ឆ្នាំ ២០១២ វិញ មាន​ត្រឹមតែ 4 លាន​គ្រឿង។

         នាពេល​សព្វថ្ងៃនេះ ក្រុមហ៊ុន Nokia បានចេញ​លក់​នូវ​ពពួក Lumia Smartphone សរុប​ទាំងអស់​ប្រមាណ​ជា 27.3 លាន​គ្រឿង តាំងពី​ពួកគេ​បាន​បញ្ចេញ​លក់ Windows Phone Handset ដំបូង​មក​ម្លេះ។

         គួរបញ្ជាក់​ផងដែរ​ថា នៅ​ត្រីមាស​ទី​ពីរ​ឆ្នាំនេះ ការចេញលក់​ស្មា​ត​ហ្វូ​ន​ម៉ូ​ដែល Lumia ទាំងអស់​នៅលើ​ទីផ្សារ​សហរដ្ឋអាមេរិក​មាន​ចំនួន 500,000 គ្រឿង ដែល​កើនឡើង​ពី 400,000 គ្រឿង​កាលពី​ត្រីមាស​មុន ប៉ុន្តែ​ថយចុះ 16 ភាគរយ​បើ​ធៀប​ទៅនឹង​ត្រីមាស​ដូចគ្នា​នៅ​ឆ្នាំមុន៕

         ប្រភពៈ The Verge